SK Rapat Jaya - Discussion Forum: Salam Perkenalan....

<< September 2010 >>

puteraminang wrote:
Assalaamualaikum,

Eden PUTERAMINANG. Jadi member website ni pado 19 November 2009 tapi bolun sompek “berkonalan”. Sibok!

Kok nak tahu, yang jadi tokoh utamo dan pelaja cemolang tahun 6 bagi 2009 tu cucu sulong denlah tu --- Nurin Yuzmaira. Yang pakai ketayap bughok dan menyibok ambek gamba kek dopan haghi tu, edenlah tu. Tak buleh salahkan den --- ompek-ompek cucu den naik pontas tghimo hadiah, daghi Pra, Tahun 2, 4 dan 6. Satu titek besejarah bagi den. Tahun dopan bolum tontu den idup laiee untuk menyaksikan ni somo. Eden tingga somo anak den (omak Nurin) sojak bini den mati kono kenser lobih 10 tahu lalu. Umo den dah nak sampai umo Nabi. Beghado dalam umo sabsidi dokek tigo tahun dah.

Untok omak bapak, eden ado posanan sikit : Jagolah anak-anak tu. Somo eh ado potensi jadi mughid cemolang. Tepulang kek kito macam mano memupok eh. Rahsio den sonang jo. Bagi dio minam LIQUID CHLOROPHYLL tigo kali saghi --- pagi, tongah haghi dan malam. Ini membuang somo toksin (ghacun) dalam bodan eh. (Budak-budak mano suko makan sayo. Jadi, kok boghi 3 sudu CHLOROPHYLL, samo dongan budak tu makan 3 KILO sayo. Kito yang tuo nipun kalau nak makan 3 KILO sayo saghi, den agak muntah daghah! Kau masak macam manopun --- kangkong blacan, sop sawi, dll, tak kan teghabih 3 KILO do, pcayolah. Edenpun tak ponah miss 3 kali saghi minam CHLOROPHYLL. Tengok yo kulit den : tak macam oghang 63 tahunpun. Bau badanpun tak ado. Uban tu adolah sikit-sikit!) Sbolun tido bagi dio makan suleh pil SAGE. Ini untuk membeno otak eh --- sonang tangkap apo yang cikgu aja, sonang ingat (tak pelupo macam den). Kok ado ko-korikulum haghi tu, boghi dio minam satu tiub LIQUID SPIRULINA sbolun poiee skolah supayo dio tak ponek (SPIRULINA ni best dalam bulan poso. Pghiso strawberi. Boghi dio minam lopeh saho, gerenti dio tak ngantuk kek skolah. Potang eh sompek main bola pulak tu kek padang sbolun buko. Bayangkan! Tak ponek!) Tapi jangan haghapkan bondo ni jo. Tak blaja tak jadi do. Luangkanlah sikit maso bimbing dio kek ghumah. Tak payah blaja mati-matian do.

Satu laiee den tengok, ramai budak ngidap asma (somput). Tak buleh minam ae sojuk, tak buleh kono angin kuek malam-malam, tak buleh kono abok. Jangan main-main. Oghang tuopun kono asma buleh mati. Dokto den cakap kalau nak somboh-an budak asma, buek sbolun dio sampai 12 tahun. Kalau tak, dio kono makan pil dokto (dadah!) seumo idop. Adik Nurin 3 oghang nipun ado asma tapi dan kughang. Eden dah jumpo saplimen yang buleh ilangkan asma ni menjolang umo dioghang sampai 12 tahun. Namo eh OMEGA SQUA. Tolan sebijik, abih saloran napeh dan saloran darah di”clear”kannyo. Slalu eh dalam maso saghi somput eh dah hilang. OMEGA nipun elok untok oghang yang takut mati mengojut! “Mati mendadak” kete oghang KL --- jantong tesumbek, daghah boku kek otak yang buleh jadi “stroke”. Anyway, kok minat dan nak cubo, atau nak tahu lobih lanjut, contact den kek 013-5305116. Oghang panggey den DUAN tapi arwah omak abah den panggey den “UJANG”.

Last skali buek sesi pengonalan ni, banyak botul kelua sughat koba kanak-kanak kono colek, cokik, rogol dan bunoh. Kok mampu dan ado kelapangan, antaalah anak-anak ke kelas TAEKWONDO. Ghamai oghang tak nampak kebaikannyo tapi satu ahgi nanti ilmu ni akan menyelamatkan nyawo budak tu. Den anta NURIN pado Julai 2004 (dio darjah 1 maso tu). Tigo tahun lopeh tu (Jun 2007) dio dapek Black Belt 1st Dan (Junior = Poon 1). Disember 2008 (Darjah 5) dio luluih 2nd Dan (Poom 2). Den train dio kek ghumah dan dio banyak dapek pingat omeh. Asma diopun dah lamo ilang (penyodut somput eh pun ntah mano den campak–an. Maghin kono bawak ke mano den poiee, takut kok kono soghang asma). Tak lamo laiee Sir NAWAS KHAN dari KELAB TAEKWONDO RSB akan anta borang. Joinlah untuk kebaikan, keselamatan maso dopan dan kesihatan anak-anak. Tak mahaapun.

Sampai sini yo kali ni. Kok den ghajin dan ado mood, ingin yo nak kongsi pengalaman idop den, termasok 6 tahun di England, supayo jadi iktiba bagi generasi mudo agar jangan buek kesilapan yang den buek. Mudah-mudahan dongan cagho ini dioghang tak payahlah mencubo dan melalui pengalaman yang pahit. Kok den kato dopan tu ado gaung cugham, jangan poiee, kau tak maun donga, poiee jugak, mampuihlah kau teghojun lam gaung tu! Ampun dan maaflah kok kato-kato dan ejo-an den menyakitkan ati ssiapo. Memang inilah cagho eh oghang Minang becakap. Kok goma menunton “Aku Budak Minang” kek TV, dapeklah idea sikit. Sampai jumpo laiee, Assalaamualaikum Warahmatullaahi Wabarakaatuh.